ព្រះសីហនុ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា តាមសំណើរបស់ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានសម្រេចបង្កើតក្រុងថ្មីមួយបន្ថែមទៀតនៅក្នុងខេត្តព្រះសីហនុគឺ «ក្រុងកំពង់សោម»។ នេះបើតាមអនុក្រឹត្យរបស់រាជរដ្ឋាភិបាល ចុះថ្ងៃទី២៨ ខែសីហា ឆ្នាំ២០២៤។ 

បើតាមអនុក្រឹត្យដដែលនេះបញ្ជាក់ថា ក្រុងកំពង់សោម ត្រូវបានបង្កើតឡើងដោយកាត់យកឃុំចំនួន ០៥ ពីស្រុកព្រៃនប់ រួមមានឃុំរាម, ឃុំបិតត្រាំង, ឃុំអូរឧកញ៉ាហេង, ឃុំបឹងតាព្រហ្ម និងឃុំអូរជ្រៅ ដែលនឹងត្រូវក្លាយជាសង្កាត់រាម, សង្កាត់បិតត្រាំង, សង្កាត់អូរឧកញ៉ាហេង, សង្កាត់បឹងតាព្រហ្ម និងសង្កាត់អូរជ្រៅ។

ទីតាំងរដ្ឋបាលនៃក្រុងកំពង់សោមដែលទើបនឹងបង្កើតថ្មីនេះ មានទីតាំងស្ថិតនៅក្នុងសង្កាត់រាម។ 

សូមបញ្ជាក់ថា បន្ទាប់ពីមានការប្រកាសបង្កើតក្រុងកំពង់សោមបន្ថែមនាពេលនេះ នាំឱ្យខេត្តព្រះសីហនុមានក្រុងចំនួន ៣ រួមមានក្រុងព្រះសីហនុ, ក្រុងកោះរ៉ុង និងក្រុងកំពង់សោមនេះផ្ទាល់៕